ಮೆಲುಕು

  ಇ ನ್ನೇನು ಸಂಕ್ರಾಂತಿ ಹಬ್ಬ ಸಮೀಪಿಸುತ್ತಿದೆ , ಅಂಗಡಿ ಮುಂಗಟ್ಟುಗಳಲ್ಲಿ ಸಾಲು ಸಾಲಾಗಿ ಪೇರಿಸಿಟ್ಟ ಎಳ್ಳು-ಬೆಲ್ಲದ ಪೊಟ್ಟಣಗಳು , ಅಕ್ಕ ಪಕ್ಕದ ಮನೆಗಳ ತಾರಸಿಯಲ್ಲಿ   ಒಣಗಿಸಿದ   ಕೊಬ್ಬರಿ , ಶೇಂಗಾಬೀಜ ,  ಪುಟಾಣಿ , ಬೆಲ್ಲದ ತುಂಡುಗಳು   ಸಂಕ್ರಾಂತಿ ಹಬ್ಬ ಬಾಗಿಲಲ್ಲಿದೆ   ಎಂದು   ನೆನಪಿಸುತ್ತಿವೆ .       ಈ ಮೊದಲೊಮ್ಮೆ ಸಂಕ್ರಾಂತಿ   ಹಬ್ಬದ ಸಂಭ್ರಮದ ಬಗ್ಗೆ ಬರೆದಿದ್ದೆ .  ಚಂದದ ಉಡುಗೆಯುಟ್ಟು , ಹೂವಿನ ಜಡೆ , ತಲೆಗೆ ಪಾರಂಪರ್ಯವಾಗಿ ಬಂದ   ಚಿನ್ನದ ನಾಗರವನ್ನು ಧರಿಸಿ ಮನೆಮನೆಗೆ ಎಳ್ಳುಬೀರಲು ಹೋಗುವ   ಬಾಲ್ಯದ ಸಂಭ್ರಮವೇ ಬೇರೆಯಿತ್ತು .    ಹುಟ್ಟಿ ಬೆಳೆದಿದ್ದು ಮಲೆನಾಡಿನ ಕೊಂಕಣಿ ಬ್ರಾಹ್ಮಣ ಕುಟುಂಬ ದಲ್ಲಿ.   ಮನೆಯಲ್ಲಿ ಹಬ್ಬ ಹರಿದಿನಗಳನ್ನು ಶಾಸ್ತ್ರೋಕ್ತವಾಗಿ , ಮಡಿ - ಮೈಲಿಗೆ , ಭಯ – ಭಕ್ತಿಗಳಿಂದ   ಆಚರಿಸುವ   ಸಂಪ್ರದಾಯ . ಆದರೆ   ಸಂಕ್ರಾಂತಿಯಂದು ನಾವು ಬೀರುತ್ತಿದ್ದಿದ್ದು ಎಳ್ಳು - ಬೆಲ್ಲವಲ್ಲ , ಬದಲಿಗೆ   ಕುಸುರೆಳ್ಳು   ಎಂದು   ಕರೆಯಲ್ಪಡುವ   ಮನೆಯಲ್ಲೇ   ಪಾಕ   ಹಚ್ಚಿ ತಯಾರಿಸಿದ ಸಂಕ್ರಾಂತಿ ಕಾಳುಗಳನ್ನು .  ಕೊಂಕಣಿ   ಬ್ಯಾಣದಲ್ಲಿ   ಬಾಡಿಗ...